新蒲崗同電影之間好似有種吸引力，一直牽引住大家，之前我哋介紹過大磡村，曾經提過香港電影早期片場就座落大磡村，唔少瘋魔東南亞嘅電影就喺呢度誕生，甚至連李小龍都經常揸住紅色賓士跑車出入片場。
當然不敵城市發展，片場早已搬走，但此地卻留住了導演們嘅目光，唔少香港電影都曾經喺新蒲崗取景，電影《樹大招風》入面，姜皓文同林家棟經常喺天台監視樓下嘅馬會同金舖，場景設定係九龍城，但現實係分開四個場景黎拍攝，衍慶街就係目標金舖嘅場景。
《志明與春嬌》當余文樂在禁煙區同楊千嬅分析（鳩噏）疑似天文台嘅貼紙檔，俾食環職員捉到嗰幕，就係彩虹道與衍慶街的交界度拍攝。
《救殭清道夫》蔡瀚憶帶住林明禎踩滑板車出街，然後企上車頂嗰幕，就係新蒲崗嘅七寶街。
我總係覺得新蒲崗就好似一個香港嘅縮影，工廈、唐樓同民生商鋪，比起早已食肆林立嘅九龍城多咗一份貼地感，或者呢個係吸引到導演們注視嘅原因。
。
。
。
。
。
————————————————————
www.penhousehk.com
地址：新蒲崗大有街35號義發工業大廈 10E
Comments