「1978年開到宜家啦，42年。亅何先生漫不經心道出。
金寶冰廳係何先生同父母一齊經營，以前何氏一家住喺沙田，當時睇中機場同工廠區嘅人流，決定喺新蒲崗經營冰廳，一開就開左42年，見証住呢個地方嘅興衰。以前冰廳有自已嘅出爐麵包，但隨住機場搬走，而家已經無再做麵包，麵包櫃雖然仲係度，但入面嘅麵包一早變成雜物。
何先生講起先知道，原來新蒲崗全盛時期有成五、六間戲院，工廠區又多工人，嗰陣嘅新蒲崗，係一個開乜都做得住嘅年代！金寶經歷半個世紀，經歷大小風風雨雨，但何先生坦言: 「42年嚟經歷機場搬遷、工廠式微，當時好多鋪都做唔住，好彩呢間鋪係自己既，果幾年辛苦啲囉！之後經歷埋沙士，但都唔夠今次武漢肺炎疫情咁大影響！亅
屹立新浦崗咁多年，除左人情味，始終要嘢食夠好味先留得住客人，呢度沙嗲牛肉麵堅持用每朝新鮮即炒嘅牛肉，入口嫩滑，更散發出陣陣洋葱味。燴意粉睇落好簡單，但要搵到好食既其實唔易，出面唔少燴意粉只係將醬汁倒上面，呢度既燴意係每條意粉吸滿茄汁，老闆話秘訣係先炒意粉後燴，同半熟蛋黃混合黎食更係一絕！
呢度既奶茶更加要推介俾大家，奶茶的靈魂所在係茶膽，佢地咁多年一直專注製作茶膽，加上三種茶葉：Lipton、四好及錦標混合，製成茶香順滑濃郁嘅金寶奶茶！
近年販賣舊式港味風情大行其道，但食到真正嘅香港味嘅冰室就買少見少，要留住昔日味道，大家就要多啲黎幫襯金寶啦。
*老闆叫我要影張素描畫，係佢一個客特意為金寶畫架！可見老闆同街坊關係都非常好。
。
。
。
。
。
————————————————————
金寶冰廳
新蒲崗康強街53號地下